D’equí n’adelante podéis seguir lleendo esti blog dende la nueva direición que ye:
Disculpes a los que me seguíeis davezu per esti dominiu, pero facía yá tiempu que quería dar el saltu a un dominiu propiu y espero seguir meyorando la páxina.
Entamamos con esta una serie de post dedicaos a unes tables perinteresantes feches por Pelayo Fernández que parten d’aspectos básicos pa furrular cola payuela, n’esti casu el subir o baxar el tonu en xeneral.
Otru día estudiaremos les distintes zones de raspao de la payuela de la gaita asturiana o los problemes más comunes que suelen presentase a la hora d’empayolar un punteru y les sos posibles soluciones.
Tabla 1. Subir o baxar tonu de la payuela
El conceptu de caña blanda/duro varía en función del material al ser la caña un material natural, pero podemos seleccionalo y tenelo en cuenta gracies al test del agua del que yá falamos anteriormente nel post dedicáu a la selleición del material.
Conocer el material ye un aspectu fundamental a la hora de ponese a facer payueles y pa conocer la caña ye básico saber el so procesu de produción dende qu’entama a espoxigar nel cañal hasta que llega al taller cortao, seco y llimpio.
El material usáu pa la ellaboración de les payueles provién, nel mio casu, d’una plantación que ta situada n’un pueblu de Valencia siendo un sitiu perafayaízu pa esta xera, a 15 km. del Mediterráneu. Ésto dai bones carauterístiques al material por nun tar n’ún sitiu de constate humedá, asina el secáu ye más precisu al nun tener que desprendese la caña del agua que ta recibiendo de siguío como otres plantaciones de ríu; el regadíu por sistema “de goteu” dai la humedá necesaria dependiendo de les condiciones del tiempu nes diferentes époques del añu.
Tamién gracies a la situación recibe aire secu que vien del poniente (aires de Castiella), el mestral (aires del Cantábricu) y por supuestu el suave del Mediterráneu.
La siega de les cañes faese nos menguantes de xineru y febreru, que son los meses nos que la caña cortada conserva la so mayor elasticidá y calidá. Darréu de la siega entama’l procesu más delicáu, que consiste en guardales a la solombra, ataes en gavielles d’unes venti unidaes pa que conserven la rectitú, faen falta lo menos tres atadures pa cada gaviella de cañes una a cada mediu metru, bien apretaes.
Nos meses de marzu – abril desátense les gavielles de les cañes y quitense les fueyes sobrantes que yá tarán seques, dexando la caña llimpio, y vuelven atase igual qu’al entamu y guardase nel mesmu sitiu.
Nos meses de secanu, xunu y xunetu, pondránse a secar por separáu cada una, yá un poco inclinaes y al sol demientres unos diez díes, dando-yos la vuelta ca dos díes pa que’l secáu seya uniforme por tola circunferencia y tengan el color doráu que se quier algamar pa dempués pasar a cortalo en trozos de la medía necesaria pa pasar a trabayalo pa facer cañes de los diferentes instrumentos de caña doble.
cañar valencia
Nel mio casu, trabayo con caña d’una plantación que ta abonada con nitratos sódicos y potásicos en réxime de materia orgánica ecolóxica, lo que lo fae un material llibre de tóxicu.
Quiero destacar dende equí l’agradecimientu a Miguel Gálvez que ye la persona que m’enseña estes y tantes otres coses sobre la caña y la so producción.
L’usu de celo o cinta aislante pa facer más pequeñu el tamañu de los furacos de les notes del punteru ye un vezu en gaiteros d’otres zones pola so facilidá y buen resultáu, pero equí n’Asturies anque si ye usáu por bastante xente otros a veces por desconocimientu o a veces por “purismos” de nun querer importar modes que n’esti casu si que son beneficioses pal instrumentu nun lo faen.
En resumides cuentes l’efectu que se consigue ye que si una nota ta alta (falamos alto o baxo en rellación cola afinación) amenorgando el diámetru del furacu con celo o cinta aislante conseguimos baxar esa nota. Ye curiosu el casu del mi natural, que tapando con cinta parte de la tronera trasera conseguimos l’efectu contrariu de subir la nota.
Pa saber cuantu tenemos que tapar pondremonos delante l’afinador (o d’oreya si tas avezáu) y habrá que dir probando hasta que la nota que queramos igüar quede nel sitiu.
Dalgo básico pa la construcción de cañes o mesmamente pal retoque d’ella una vez empayuelada la gaita ye tener una buena navaya en buenes condiciones d’afilao. Nel mercáu hai munches navayes especiales que los instrumentistes d’oboe o de fagot usen pal raspau de les cañes, pero na mio opinión son demasiao cares (polo xeneral) y non siempre ta relacionao la calidá – preciu d’estes navayes o cuchillos.
Sin dir más lloñe, podemos averanos a Taramundi, conceyu d’Asturies de gran tradición cuchillera y navayera nel que de siempre hubo gran fama d’artesanos y podemos escoyer entre tolos modelos que faen. Hai dalgunos artesanos que conocen les navayes de punta chata como “navallas de palletas” porque sabíen que yeren buscaes polos gaiteros pa repasar les sus payueles.
Podemos buscar la que más nos preste y de xuru que nos va durar munchu tiempu mentantu la mantengamos bien afilada y bien cuidada, la única recomendación ye que la merques n’aceru al carbono, muncho meyor que l’inosidable.
Pa tener una lo meyor ye averase hasta Taramundi y consultar na oficina de turismu el llistáu d’artesanos de navayes a los que podéis dir a ver personalmente, si queréis la d’unu n’especial o si non nes tiendes de la villa vais poder atopar una gran variedá de navayes de diferentes artesanos.
navayes de taramundi
Esti fin de selmana disputose nel Pazo de Congresos e Exposicions de Galicia en Santiago de Compostela la primera fase de la XXII Liga Galega de Bandas de Gaitas onde competíen les asturianes BG Candás en primer grau y BG Ribeseya en segundu.
Nel casu de segundu y primer grau la competición desendolcose pola tarde y tuvo los siguientes resultaos.
2º Grao.
1. Ribeseya
2. Os Blancos
3. Os Trintas
La banda ganadora d’esta fase, la asturiana de Ribeseya dirixida por Diego Purón y Álvaro Cueto saco un total de 24,65 puntos más que la segunda clasificada, Os Blancos de Ourense que quedo más axustada cola tercera clasificada, Os Trintas de Trives quedando a 2,4 puntos.
1º Grao.
1. Ledicia & Fornelos de Montes
2. Candás
3. Xinzo de Limia
N’esti casu el premiu quedo en tierres gallegues pa la banda Ledicia & Fornelos de Montes que quedo a 4’49 puntos de la segunda clasificada, la banda asturiana de Candás dirixía por Velu Muñiz. La tercera clasificada, la banda ourensana de Xinzo de Limia quedo a namás 1’11 puntos del segundu puestu de Candás polo que la competición tará reñida na segunda y última fase de la liga que se va cellebrar el caberu fin de selmana de xunetu pero que inda nun se sabe onde va tener llugar.
Puen consultase les puntuaciones completes na web de la Federación Galega de Bandas de Gaitas
Norabona dende equí a les bandes participantes y suerte pa la segunda fase.
Como ye vezu tolos años sobre estes feches, los díes 5,6 y 7 d’abril van tener llugar en Vigo los VI Obradoiros Xarabal, entamaos pola Banda de Gaitas Xarabal
Esti añu hai ocho obradoiros diferentes nos que rescamplen n’interés pa los gaiteros los de “Construcción de palletas” impartíu por Patricia Cela, (artesana de gaita gallega formada na Universidade Popular de Vigo colos maestros Antón Corral y Carlos Corral), “Afinación da gaita” impartíu por Paulo González, (llicenciáu en Flauta de Bisel, llicenciáu n’Hestoria y Ciencies de la música y gaiteru col título de Grau Profesional de gaita galega), o tamién “Gaita galega” impartíu pol actual director de la Banda de Gaitas Xarabal, Xurxo Fernández que vien de terminar los sos estudios nel Conservatoriu Superior de Música de Vigo na especialidá de “Instrumentos da música tradicional e popular de Galicia” algamando la másima calificación nel so conciertu de fin de carrera.
La fecha límite pa poder apuntase ye’l prósimu 30 de marzu y podéis ampliar la información na páxina web de la banda nel siguiente enllaz
Un fin de semana perinteresante si vos podéis averar per ellí pa aprender tolo posible con unos profesores de nivel y un preciu mui asequible.
Obradoiros Xarabal 2012
Una parte de la payuela que tien muncha importancia y a la que non siempre se-y da tol interés ye’l ferrete. Ye’l tubu nel que se monten les pales, n’otros instrumentos y otres zones denominao tamién tudel. Faese partiendo de tubos de llatón de diámetros y medíes variables en función del tipu de punteru pal que vaya ser la payuela, bien sea pola tonalidá o pol constructor. Polo xeneral, si aumentamos el ferrete en llargu o en diámetru conseguimos una payuela más baxa y si al contrariu lu facemos más cortu o de menos diámetru más alta.
N’esta entrada vamos seguir el modelu de construcción de Pelayo Fernández por ser ún de los más universales pa gaita asturiana, necesitamos pa ello tubu de llatón de 2,75 mm de diámetru interior y 3,25 mm de diámetru esterior. Estos tubos normalmente suelen topase en tiendes de material de modelismu y pa cortalos a la medía necesitaremos tamién un cortatubos pa diámetros pequeños que podamos topar en ferreteríes.
Un llargu estándar que suel funcionar bien en toles gaites en Do modernes ye 20 mm. Tenemos que cortar un cachín de tubu d’esta medía al que repasaremos el corte del cortatubos con una lima pa metal. Dempués de tener el tubu a la medía de llargu y de diámetru pasaremos a da-y la forma necesaria a la boca, pa esto vamos necesitar facer un mandril, podemos facelu a partir d’un destornillador planu o d’un cachu fierro que tenga marxen pa poder trabayalu hasta dai la medía necesaria.
Les medíes necesaries pa esti mandril son d’un mm d’anchu na punta coles esquines redondeaes, el llargu hasta onde entrará el ferrete va ser de 20 mm de llargo y el chaflán que-y va dar la inclinación al ferrete ye de más o menos 2/3 de la lonxitú del ferrete (13’3 mm).
En teniendo el mandril y el tubu cortáu a la medía de llargo metemos el tubu que a partir d’esti pasu va ser yá un ferrete y vamos machacándolu con un martiellu hasta dai la forma del mandril. Si fai falta repasamos la boca con un alicate y yá tenemos un ferrete nel que poder montar les pales pa construir una payuela.
Ferretes
Yann Kermabon y Stephane Kermabon
Los díes 23 y 24 de marzu va tener llugar na “Escuela de Música Tradicional Manolo Quirós” d’Uviéu un cursu de música bretona a cargu del dúu Yann y Stephane Kermabon. El cursu va desendolcase el vienres de tarde de 19 h a 22 h y el sábadu pela mañana de 10 h a 13 h.
Ta programau en dos partes, una d’aspectos mas teóricos como tipos de bailles, particularidaes de los distintos xéneros musicales, repertoriu de marches y melodíes, escuches de grabaciones o por exemplu como construir una suite bretona. La otra parte, más práctica va trabayase yá cola gaita na ornamentación, les variaciones y les técniques propies de la gaita bretona.
L’únicu requisitu pa los alumnos ye un nivel mediu-altu de gaita.
El preciu ye de 20 € pal públicu en xeneral y de 10 € pa los escolinos de la E.M.T Manolo Quirós, hai un límite de 20 alumnos y podéis informavos nel correu elletrónicu lalagunadeltorollu@hotmail.com
Si queréis apuntavos el teléfonu de la escuela ye 985 25 50 49 y el plazu ta abiertu hasta’l día 20 de marzu.
El cursu ta entamáu pola Banda Gaites La Laguna del Torollu en collaboración cola E.M.T Manolo Quirós y col sofitu del Conceyu d’Uviéu.
Equí podemos ver a los profesores del cursu nel Championnat de Bretagne des Sonneurs, cellebrau va unos meses en Gourin
Les notes de requintu na gaita asturiana correspuenden a la segunda octava de la que’l punteru tradicionalmente podía dar media (anguaño tan desendolcandose nuevos punteros, estudios y posiciones p’algamar una segunda octava entera). Son notes bastante usaes na música asturiana, sobremanera nos floreos que’l gaiteru toca al entamu y al final d’una pieza pa probar la gaita y calentar los deos pero que pola so poca duración nun se-yos presta demasiada atención a la afinación.
Un problema mui común nes gaites al subir a estes notes de requintu ye que’l roncón varíe porque estes notes consiguense con mayor presión d’aire na payuela. Si queremos podemos amenorgar considerablemente la variación del roncón si a la hora d’afinar el mesmu separamos la copa y la tercia, envede afinar el roncón como normalmente se fae moviendo namás que la tercia separandola o xuntandola cola prima. Repartimos asina la presión del fluxu d’aire nes tres pieces envede facelo namás qu’en dos.
Al nun abrir tanto la prima y la tercia y abrir ente la tercia y la copa algamamos que les cámares interiores del roncón formaes polos diferentes diámetros de los taladros interiores se compensen, l’aire circula más estable y la variación de soníu del roncón al requintar ye muncho menor.
Separación copa y tercia roncón
Payueles y payones pa gaita 