Reeds & Drone Reeds for asturian bagpipe

Latest

Cursu de construcción de Palletas e Pallóns por Jaime Pena

El prósimu sábadu 10 de marzu va tener llugar na TradEscola de Música Tradicional de Lugo un cursu de palletas y pallóns (payueles y payones pa gaita gallega) impartíu pol artesanu Jaime Pena.

El cursu va desendolcase n’horariu de 10:00 h a 14:00 pola mañana y de 16:00 h a 19:00 h pola tarde, el preciu ye de 20 € p’alumnos de la TradEscola de Música Tradicional de Lugo o pa los socios de l’Asociación de Gaiteiros Galegos y de 25 € pal públicu xeneral.

L’únicu requisitu pa los alumnos ye llevar un alicate y una navaya.

Les places tan limitaes a 15 persones y podéis apuntavos nel teléfonu 982 22 99 66

Cartelu del cursu de palletas e pallóns, 10 de Marzu, Lugo

Cartelu del cursu

“¡Ya llegan los gaiteros! La pareja de gaita y tambor en las Fiestas Patronales Asturianas”

portada del discu

portada del discu

“¡Ya llegan los gaiteros! La pareja de gaita y tambor en las Fiestas Patronales Asturianas” ye un trabayu del gaiteru Ricardo Soberado y el tamboriteru Manuel Durán editáu pola Fonográfica Asturiana nel que se reproducen exemplos del orden nel que se desendolcaba un día de fiesta: alborada, misa y baille.

Al mio entender ye un trabayu perimportante tantu pol repertoriu como pol sentíu que tenía la gaita y el tambor nes fiestes n’Asturies. Güei hai yá poques fiestes onde la pareya desendolque tol llabor que facía enantes, por varies causes, a lo primero porque hai xente reacio a que la pareya madrugué pa l’alborada col fin de facelos madrugar a ellos tamién (tradicionalmente la gaita y el tambor entamaben a tocar a eso de les 8 la mañana), otros como l’apaición de les orquestes modernes quitaron al gaiteru y al tamboriteru del so puestu como músicos pal baille, ya fuere a lo suelto o a lo agarrao.

El sentíu de la fiesta y como tien de ser tocada ye algo que tou gaiteru tendría qu’estudiar nes escueles de música tradicional col enfotu de conservar les tradiciones y la forma de tocar propies de los gaiteros asturianos que ficieron esfrutar a la xente demientres munchos años.

Ye un discu a tener y a estudiar tantu por gaiteros como por tamboriteros yá non pol estilu de tocar de Ricardo y Manolín (que tamién) sinón pol valir documental que tien tantu la grabación como’l llibrín con testos de Fonsu, director del Museu de la Gaita de Xixón y con varies semeyes históriques como la qu’ilustra la portada na que salen el Gaiteru de Llugones y el Tamboriteru de Tiñana nes fiestes de San Roque en Llanes en 1893


Podéis mercar el discu al traviés d’esti blogue poniéndovos en contactu conmigo de les formes qu’indico na llingüeta de contactu al preciu de 10 € más unvíu.
Manuel Durán (tambor) y Ricardo Soberado (gaita)

Manuel Durán (tambor) y Ricardo Soberado (gaita)

Championnat des Bagadoù Brest 2012

Güei tuvo llugar na ciudá bretona de Brest el Championnat des Bagadoù de primera categoría d’esti añu 2012. Entamáu como ye vezu tolos años pola asociación Bodadeg Ar Sonerion, qu’axunta tolos bagadoù de Bretaña.

El campeonatu, retransmitíu en directu pol canal France3 – Breizh y pola páxina web Antourtan, ufierto les actuaciones de tolos bagadoù, toos ellos de gran calidá, montaxes guapos como los qu’avecen a tocar esti tipu de formaciones compuestes por gaites, bombardes y percusiones fundamentalmente.

El ganador foi’l Bagad Kemper con un set bien guapu y bien empastáu de soníu, mentantu el segundu puestu foi pal Bagad Cap Caval y en tercer llugar quedo’l Bagad Kevrenn Alré. Equí podéis ver les puntuaciones oficiales de la web de BAS.

Bagad Kemper (Brest 2012)

Bagad Kemper (Brest 2012)

Bagad Kemper recoyendo los trofeos de campeones

Bagad Kemper recoyendo los trofeos de campeones

El taller de gaites de Cogollu

Manuel de Cogollu

Manuel Álvarez (Manuel de Cogollu), ñació en Cá Valiente Carbayal (Llanera). Na casa teníen un taller de carros y madreñes y pel iviernu contrataben a madreñeros que llegaben dende Vioño (Gozón). Ún d’ellos trayía una gaita cola qu’amenizaba les nueches tan llargues de la ivernada. Manuel sintióse atrayíu; la curiosidá y la disponibilidá de ferramienta del taller fizo que se decidiese a intentar fabricar una gaita él mesmu copiando de la del madreñeru de Vioño. Darréu quiso aprender a tocala atendiendo con procuru pa los gaiteros de la zona.

Casóse con Carmen Vega nel pueblu de Cogollu (parroquia de San Xuan de Trasmonte de Les Regueres). Ellí siguió col oficiu y nel so taller – fragua del Rozu siguió tamién perfeccionando l’instrumentu algamando notables resultaos en timbre y afinación. Tuvo cinco fíos: Ramón, José, Bernardo, María y Antonio. Cuenten los sos allegaos qu’amás d’Antonio que foi quién siguió col so legáu, llegaron a tocar bien la gaita Ramón, Bernardo y María.

Antón de Cogollu

Antonio Álvarez Vega (Antón de Cogollu) ñaz nel añu 1883 y sigue construyendo gaites nel taller de so pá hasta que casa con Leonor Valdés de Cá Rufa nel pueblu d’Alceu (parroquia de Sotu de Les Regueres) onde instala’l nueu taller. Tuvieron nueve fíos: Florentino, Manuel, Corsino, David, Primitiva, Amada, María, Alegría y Francisco Antonio.

Esti caberu llegó a facer alguna gaita, pero una enfermedá de mozu dexólu indispuestu y torgó la posible continuidá d’esta saga d’artesanos.

La meyor forma de conocer lo que fue’l taller y el trabayu d’Antón en Sotu ye lleer lo que nos cuenten dos colectivos diferentes: los que lu conocieron (xente de la so familia como la muyer o los fíos) y los qu’estudiaron a fondu el so trabayu (gaiteros como Pepe Veriña, Ignacio Noriega o José Angel Hevia o constructores de gaites como Vicente Prado “El Pravianu” o Alberto Fdez. Velasco

EL TALLER

Pepe Veriña (gaiteru): “Yo de chaval tuve nel taller; tenía nel portalón de casa un tornu de pértiga, d’esos que se movíen por una cincha de cueru y pedal; sacaba la copa’l roncón d’una sola pieza y bien vaciada.”

Ignacio Noriega (gaiteru): “… tamién m’alcuerdo que tenía un tornu mui grande y que yera de pedal, y que les copes torneábales d’una pieza y vaciábales ente les piernes…”

Monchu (vecín de Villayo, Llanera): “mio pá tocaba la gaita y fui con él a buscar una a Alceu…. El taller, si podía llamase asina, teníalu debaxu la sala y el tornu yera nada; una polea de cornal de sobéu a pedal..”

El Pravianu (gaiteru y constructor): “… Los torneaos tan perfectos, incrustaciones de marfil… pero quedé ablucáu cuando nel añu noventa pude ver el tornu y la ferramienta que conserven na so casa, faciéndome la idea de los medios colos que trabayaba.

Alberto Fernández Velasco (constructor de gaites): “… y estos paisanos, con un tornu de ballesta, facíen milagros…”

Pieces que conserven en casa de Cogollu

LA MAERA

Emilia (vilba de José Valiente de Carbayal): “… la maera y el marfil de la gaita del mio suegru Valiente, traxéronla unos familiares d’Estaos Xuníos…”

Ignacio Noriega (gaiteru): “ Pues al tíu Antón conocílu una vegada qu’unos indianos de Vidiago vinieron y dixéronme que queríen encarga-y una gaita con maera que traxeren, creo que yera ébanu…”

Alegría Álvarez (fía d’Antón): “… facía munches de buxu, al principiu diba por él al palaciu de Cañe… tamién traíen familiares y amigos maera d’América… “

Marfil conservau en su casa

EL FUELLE Y EL VESTÍU

María y Alegría Álvarez (fíes d’Antón): “Mio pá mercaba algunes de les oveyes a la vecina, Josefa La Pila, y él matábales… la pelleya envolvíala un tiempu en sal, dempués untábalo en ceniza o fariña de maíz, colgabalos con paya dentro pa que aireasen”

“cosíamos los vestíos pa les gaites Alegría y otra hermana, Primitiva. Tamién una señora d’Uviéu que yera la muyer d’un teniente de la Fábrica de La Vega, ella facía flecos a mano y fundes bordaes… “

Fecha por Manuel de Cogollu

Fecha por Antón de Cogollu envirolada en marfil

LES PAYUELES

Gelín de La Casuca (gaiteru de Les Regueres): “… conocí personalmente a Antón y yera muy maniáticu pa trabayar. Facíales de nueche cuando nada ni nadie lu molestare… yeren más piquiñines que les d’agora…”

Alberto Fernández Velasco (constructor): “… les gaites en do# salieron mui buenes, pero cuesta empayuelales. Dixéronme Fariñas y Pepe Blanco qu’él empayuelaba de viciu. Los instrumentos con él, teníen la vida que teníen que tener, porque yeren paríos por él…”

Ignacio Noriega (gaiteru): “… pues home; yera mui buen paisanu y mui buen gaiteru, amás facía buenes payueles; aquelles sonaben siempre…”

LA VENTA DEL INSTRUMENTU

Mª del Carmen (nieta d’Antón): ”… yo yera mui neña cuando morrió mio güelu, pero alcuérdome de velu marchar cola burra y sacaos de punteros pa vender. Otres veces garraba’l tren y marchaba unos díes con gaites. Tamién llegaben encargos por carta d’indianos y pasaba muncha xente pol taller a recoyer los encargos…”

Rogelio Fernández Lana (gaiteru de Teberga): “Diba muncho pola zona a dexar encargos, yo a reparar iba a so casa…”

Nemesio (gaiteru de Torrestío): “… yo supe d’él polos que llevaben el ganáu a Torrestío d’ehi de Les Regueres; mande-y una carta encargando-y una y llevómela hasta Teberga…”

Gelín de Villamiana (gaiteru): “Fue a comprámela José El Xarreru a so casa porque teníen amistá… costóme cuatro mil quinientes pesetes; que me paecieron munches perres. Díxome José “lo bueno hai que pagalo”.

Gelín de La Casuca (gaiteru de Les Regueres): “… cuando quería vender una gaita, poníase a tocala y arremolinábase la xente al so alredor y terminaba vendiéndola…”

Punteros de Cogollu

LA HERENCIA MUSICAL DE COGOLLU

Enrique Mariño El Xarreru la Cuesta de Fitoria foi’l principal deprendiz de repertoriou musical tradicional. En cuantu a la construcción del instrumentu sabemos que Pachu el de Turón pasó llargues temporaes en Alceu, primero deprendiendo a tocar y más tarde viendo como’l maestru Antón torniaba y empayuelaba. Tamién Agapito Pombo en Caborana tenía como referencia los punteros de Cogollu.

Antón ganó seis premios nacionales, varios na Esposición Provincial d’Artesanía, diplomes y medalles.

Gaita fecha por Antón de Cogollu

Nos años ochenta los sos seguiores y estudiosos de la so obra fueron Vicente Prado “El Pravianu” y el recientemente fináu Alberto Fdez. Velasco. A partir d’esti modelu y como ellos mesmos dixeron, con munchu camín abiertu gracies a Antón, punxéronse a trabayar pa temperar y cromatizar el punteru. Con motivu del actu conmemorativu del cincuenta aniversario de la muerte d’Antón (cellebrao el 27 de marzu de 2009) pudimos oyer d’estos dos maestros frases como les que siguen:

El Pravianu: “Cuando entamé a construir en 1978, supe que Cogollu había sio conocíu por tolos gaiteros antiguos y valoráu como’l meyor fabricante de gaita. Toles que llegaron a mí les estudiaba, analizaba y quedaba ablucáu de lo bien trabayaes que taben. Indudablemente foi un home con unes cualidaes estraordinaries pa trabayar. La familia Cogollu foi un pasu perimportante pal perfeccionamientu del instrumentu y el so recuerdu quedará siempre na mente como que lo foron padre y fíu; los meyores.”

Alberto Fdez Velasco: “Él pa mí foi un adelantau de la época… yo namás puedo falar bien d’él y nun lu conocí. El so trabayu siempre merecióme un respetu pergrande, tolos instrumentos qu’empayuele suyos, toos salieron airosos. El so mayor don yera’l timbre y la tónica. Tuvo munchos admiradores, que fuimos los que lu defendimos. Hebo algún problema, porque prestáronse les gaites y tola xente no fue seria al querer copialu y metíen allá de too y aquella timbración que teníen, algunes perdiéronla.

José Angel Hevia (gaiteru): “…la factura de los sos instrumentos merez l´adxetivu d´esquisita. Una pieza torniada poles manes de Cogollu ye más qu´una pieza de gaita. Ye una pieza d´un instrumentu musical. Güei tocamos gaites basaes organolóxica y estéticamente nes de Cogollu. Fixéronse estudios acústicos de los punteros, midiéronse una y cien vegaes los conos interiores, radiografiáronse instrumentos a la gueta d´un secretu tan buscau como´l de Stradivarius. Seguimos la pauta de Cogollu n´estos tiempos nos que la fabricación de gaites nun ye axena a les nueves tecnoloxíes, a la informática, al control numéricu”.

Hebo na gaita asturiana un antes y un dempués del modelu de Cogollu. Manuel y Antón consiguieron graos d’afinación desconocíos hasta aquella fecha y un timbre qu’entovía güei sigue persiguiéndose como’l xenuinu del nuesu instrumentu. Llegaron a construir una amplia gama de punteros, personalmente conservo una docena que van dende 23 cm a 34.5 cm (Mi a Sib). Toos estos testimonios describen a unos artesanos perfeccionistes que con unos medios non mui allá, algamaron unos resultaos sobresalientes.

Alfonso Fernández (Fonsu Les Regueres)
Toles opiniones foron recoyíes por Fonsu y publicaes más estensamente nel Anuariu 2 de la A.C “La Piedriquina”

(Quiero agradecer a Fonsu Les Regueres esti artículu y el so trabayu de dignificación de la gaita asturiana teniendo na memoria a xente como Manuel o Antón de Cogollu, figures perimportantes de la tradición de gaita n’Astutries)

Les partes de la payuela

Güei vamos falar de les partes de la payuela, si bien yá falamos de lo que yera teóricamente una payuela entovía nun lo ficimos de les sos partes.

En primer llugar onde montamos la payuela ye’l ferrete, n’otres zones del mundu y otros instrumentos tien otros nomes como tudel pero n’Asturies la más usada ye ferrete. Ta fechu polo xeneral de tubu de llatón, que ye un metal maleable y que nos permite da-y la forma necesaria a la boca. Les dimensiones del ferrete son perimportantes yá que na nuesa payuela al tener unes dimensiones bastante reducíes en comparación coles d’otros instrumentos, un milímetru arriba o abaxo notase y bastante.

Dempués tan les pales de caña onde ca ún usa unes medíes y unes téuniques diferentes de sacar la lámina del tubu. Tenemos que sacar una lámina de más o menos 0’5 mm d’espesor a partir del espesor inicial del tubu qu’anque suel variar andará más o menos pol mediu centímetru de paré.

Cuando yá tengamos les pales y el ferrete fechu queda montala, pa esto yo uso filu de nylon como usen los fagotistes pa les sos cañes, ponemos cuidáu a la hora d’amarrar pa que vayan toles vueltes del filu una detrás d’otra y quede bien amarrao, al final facemos un par de vueltes p’aseguralo cuando llegamos a la parte d’arriba onde tenemos que parar y volvemos a baxar pa facer el ñudu na parte d’abaxo de la payuela. Enriba d’esti primer atáu meteremos filu d’algodón pa facer el conu que nos va permitir subir o baxar la payuela na garganta del punteru.

Otra parte perimportante de la payuela ye’l frenu, tradicionalmente montábense fechos d’una tirina de cañavera lo mesmo que les pales pero del esterior, aprovechandose casi la corteza de los tubos. Anguaño usase tamién filu de cobre pa cañes d’oboe, que permite el mesmu resultáu y ye más fácil de colocar y de manipular posteriormente pol gaiteru.

Partes de la payuela (Debuxu de Pelayo Fernández)

Técniques esperimentales de selleición del material (cañavera)

(Esti trabayu ye obra de Pelayo Fernández Fernández y ta tornáu al asturianu por Raúl García García)

La primera criba del material ye l’análisis visual de los tubos. Desaniciaremos los que tengan grietes, ten alabeaos o nun tengan una forma buena.

La estructura interna del tubu, fibres vasculares y el restu de célules de la matriz adáptense a la forma del tubu, poro, si el tubu ta torcíu o tien defectos na forma, tola estructura interna del tubu tará igual. La intención n’esta selleición ye quedanos colos tubos rectos que tengan una seición anular lo más uniforme posible.

Siguiendo col análisis visual hai criterios de selleición basándose nel collor de la caña, sobretou nel collor de la corteza esterior de la caña. Les pieces que tienen un collor amarillu oru, ensin manches na superficie son les meyores, esto indicanos que los tubos tuvieron un bon procesu de secáu y curao. Tamién hai caña que nun cumple estos criterios y que pue furrular porque nun ye un criteriu esactu, pero si vemos tubos con zones negres, grises o blanques lo meyor ye nun trabayalos pol mal resultáu que nos pue dar.

El caberu puntu d’esta selleición visual tien que ver cola rugosidá del tubu. El secáu y el curao de los tubos ye un procesu d’elliminación d’agua que fae que la estructura interna de la cañavera vaya camudando mui sele. Cuando estos procesos nun se faen bien (sobremanera el secáu) la capa esterior de la cañavera vese afeutada polos cambios internos, lo que produz deformaciones que dexen la capa de fuera con rayines.

El test del agua, medía de la densidá

Ún de los métodos más aceutaos ye’l Test del Agua. Esti test da una idega aprosimao de la “dureza”  de la caña. Con esta preba calculase la rellación de densidá de la cañavera comparao cola del agua. Ye un sistema paecíu al furrulamientu d’un densímetru de fluxos. Pero n’esti casu marcase’l fluxu.

Al dexar marcao el fluxu, la so densidá ye constante pa tolos test, asina que vamos dir sacando los resultaos de los valores de densidá pal material. Estos valores ente les distintes muestres de caña interprétense como “dureza” del material porque conozse que la mayor parte de la densidá [4] de la cañavera ye poles fibres del material, asina como que a más fibres tenemos un módulo E muncho más grande nel material [5]. Esti fechu tamién ta estudiao en materiales paecíos como ye’l bambú. [8]

Esquema del ensayu del test del agua
Esquema del ensayu del test del agua

Pa facer esti test necesitamos un recipiente nel qu’entre tol agua que necesitamos onde vamos medir el llargor de cada muestra que metemos nel agua.

Pa sacar el valor del test dividese el llargor somorguiáu nel agua ente’l llargor total del tubu. Pa que seya más fácil la llectura del resultau (menor qu’ún), multiplicase por cien colo que nos da el valor de la “dureza” de la caña que temos midiendo en tantu por cientu.

Como yá se dixo el test da la rellación de densidá de la cañavera frente al agua, rellaición que sal igualando la ecuación d’estática de fluxos “Pesu = Emburrie” pa esti casu concretu.

Según los resultaos del test tenemos tres grupos

< 50 % : Cañavera blando

Del 50% al 70 %: Rangu apropiáu.

> 70% : cañavera duro

Los términos referíos a “dureza” (blando  y duro) refiérense a la resistencia a la vibración que va presentar la caña construyía con una pieza de material n’esi rangu de valores.

Referencies:
4. E. Obataya. M. Norimoto. Acoustic properties of cane (arundo donax) used for reeds of woodwind instruments. 1.the relathionships between vibrational properties and moisture contents of cane. Mokuzai Gakkaishi 41:289 – 292, 1995
 
 5. E. Obataya. M. Norimoto. Acoustic properties of cane (arundo donax) used for reeds of woodwind instruments. 2. Analysis of vibrational properties by a viscoelastic model. Mokuzai Gakkaishi 41:449 – 453, 1995.
 
8. H.C. Leung  Tommy Y. Lo, H.Z. Cui. The effect of fiber density on strenght capacity of bamboo. Material letters, 58 : 2595 – 2598, 2004.

“Método para construcción de palletas e pallons”

Esti ye’l primer documentu qu’escolingo equí rellacionao cola construcción de payueles, tratase del “Método para Construcción de Palletas e Pallons”. La palleta galega si bien nun ye esactamente igual en cualidaes a la payuela asturiana ye bien interesante estudiar el so casu particular por ser al igual que nós una caña doble.

Ta escritu por Antón Corral, Ramón Corral y Carlos Corral dientro de les actividaes de la Escola de Artes e Oficios de Vigo y en concretu del Obradoiro de instrumentos musicais populares galegos. Gracies a esta escola y sobre tou gracies a Antón Corral güei Galicia pue presumir del nivel d’artesanos de gaita que tien.

Método construcción palletas e pallons

Quiero qu’esti blogue seya un puntu onde topar información pal instrumentu, y coses como esten nun tan de más n’el. Que vos preste.

(Torno a subir el métodu a otra plataforma de descarga dempués del pieslle de megaupload y viendo que yera bastante solicitau, agora podéis descargalu dende netload)

http://netload.in/dateipSzaVJg7MZ/CursoPalletas Antón Corral.doc.htm

Web del Obradoiro Corral en Tui (Pontevedra)  http://www.obradoiro-anton-corral.es

Quién foi… Norino’l Gaiteru d’El Carbu

Norino (Semeya d'archivu de La Voz d'Asturies)

Norino (Semeya d'archivu de La Voz d'Asturies)

Blas Honorino García Fernández, más conocíu como Norino’l Gaiteru, nació’l 17 de setiembre de 1917, y vivió tola so vida na que llamen “La Casuca”, n’El Carbu, Sotrondiu, conceyu de Samartín del Rei Aurelio.

Norino foi gaiteru de la vieya escuela, al que-y venía la raza de gaiteru yá de familia porque so pá Leandro García Rodríguez, Leandrón, tamien tocaba y construía gaites. El gaiteru d’El Carbu, otru nomatu pol que se conocía a Norino taba avezáu a toles estayes de los gaiteros tradicionales, lo mesmo tocaba pa la misa y la procesión que pal pasucáis y el baille na romería, incluso tamién cuando yera mozu acompañabase cola gaita pa cantar él mesmu, un palu al que-y dieron pocos gaiteros.

 Norino deprendió l’oficiu del so pá y de dellos gaiteros que sintió tocar siendo mozu, ente los que s’alcuerda bien del Gaiteru de Llibardón, Pepe La Piedra de Mieres, y Antón el del Tocote d’Uviéu. Prestaba-y floriar bien de tiempu lo mesmo pal entamu que pa lo cabero, orniando les notes nel punteru ensin llevantar muncho los deos. El repertoriu de Norino yera enforma grande, bailles antiguos a lo suelto, xota, llixeru y muñeira, amás de dellos pasudobles pa baillar a lo agarrao y les marches pal pasucáis de pela mañana. Otres pieces yeren el fandangu puntiáu y l’alborada. Pa la misa tenía dellos entemedios y marches procesionales, incluyía la que tocaba pal ramu, amás d’un kyrie instrumental que quiciabes tuviese enrazáu cola Missa de angelis (sieglos XV – XVI) y seya’l testimoniu caberu na fastera Les Cuenques d’una costume qu’hebo per Asturies y que foi la de cantar la misa en llatín acompañada a la gaita, como inda se caltién y s’estila en La Pereda, Parres, Salas y Morea d’Ayer.

Norino como los gaiteros d’antañu facía les sus propies payueles y anque les trabayó bien de tiempu de cañavera, tamién les facía de plásticu, pola so estabilidá na gaita y porque aguanten muncho más que les otres.

El pasáu mes de setiembre, Norino dexonos a los sos 94 años d’edá y con él perdióse una figura perimportante de la gaita n’Asturies y sobremanera na cuenca minera, estilu del que yera fiel reflexu Norino. Amás del so gran valir como persona, siempre interesáu en deprender a les nueves xeneraciones pero tamién en deprender de la xente mozo. Yo personalmente tuve la suerte de compartir una tarde de seronda con él na so casa  hai yá unos cuantos años y pude velu tocar la gaita, razón de sobra pa quedar ablucáu de cómo tocaba El Gaiteru d’El Carbu.

Discu Norino'l Gaiteru (El Carbu, Sotrondiu)

Discu Norino'l Gaiteru (El Carbu, Sotrondiu)

(Gran parte de la información d’esta entrada ta sacada del libretu del discu “Norino’l Gaiteru – El Carbu, Sotrondiu” editáu pol Muséu del Pueblu d’Asturies na serie d’Archivu de la Música Tradicional y que vos recomiendo mercar como documentu impagable de la tradición gaitera na zona de Les Cuenques)

Que ye una payuela?

La payuela ye una caña doble fecha de cañavera, ta formada por dos lámines de caña xuníes con filu a un tubu metálicu llamau ferrete, lleva amás un frenu pa regular l’abertura de les pales.

Esti frenu consiste tradicionalmente en dos tirines de caña amarraes polos estremos que permiten abrir o cerrar la boca de la payuela. Anguaño tamién se usen frenos de chapa de llatón o de filu de llatón como les cañes d’oboe o fagot.

payuela pa gaita asturiana terminada

Payuela con frenu modernu de filu de llatón

La payuela ye a la fin, lo que fae sonar el punteru, tubu melódicu principal de la gaita.

Con que se faen les payueles? Arundo donax

La caña común (arundo donax) ye una planta perenne de la familia de les gramínees qu’anque d’orixe oriental y non siendo oriunda de la Península Ibérica, asentóse perfeutamente nes riberes del centru y particularmente na rexón mediterránea, contribuyendo a ello la facilidá que tien pa espardese formando cañares pergrandes a les orielles de corrientes y riegos.

Esta planta forma un tueru rastreru y ramificáu, que vexeta a poca fondura en tierra sustancioso que retienen la humedá, consiguiendo asina espoxigar  tallos duros, vacíos, maderizos y recubiertos poles vaines de les fueyes, altos, reutos, con ñudos a trechos, (cuando tan mui siguíos, son los cañutos machu), pudiendo algamar hasta 6 metros d’altor nun añu de crecimientu. Les fueyes son anches, planes, llanceolaes y daqué ásperes.

Tan remataes por panoyes en tonos violetes, bien ramoses,difuses y compautes ( d’unos dos palmos de llargor) y florien na seronda.

Plantación de caña (Semeya de Miguel Galvéz)

Ye la materia prima cola que se faen les cañes de distintos instrumentos musicales de llingüeta simple, como puen ser el saxofón y el clarinete, o de llingüeta doble, como l’oboe, el fagot o como ye’l nuesu casu, la gaita.

La caña usada tradicionalmente n’Asturies foi siempre lo de los cañares de les riberes de los ríos asturianos, que, anque fuera una caña de baxa calidá debío a la humedá del nuesu clima, los gaiteros siempre supieron fabricar una payuela pa la so gaita colos recursos que teníen cerca.

Anguaño, trabayamos con caña de la zona del Llevante mediterráneu o del sur del estáu Francés que nos apurre una meyor calidá.

Vista del corte d'un tubu de caña