Reeds & Drone Reeds for asturian bagpipe

Raúl García

Entamo a tocar la gaita a finales del añu 1999 na Escuela de Música Tradicional de Llangréu teniendo como profesor a Chus Solís, (gaiteru y Artesanu Constructor de gaites). Un par d’años dempués entro na Banda Gaites Conceyu de Llangréu.

Nel añu 2007 entro na Banda Gaites Villaviciosa – El Gaitero baxo la direición de Martín Poladura Berros, banda na que toco hasta’l branu de 2011.

Anguaño formo parte dende la so fundación a finales del añu 2011 de la Banda Gaites LaKadarma de Nava.

Tamién recibo clases de gaita d’otros profesores como Diego Pangua nos años 2009 y 2010.

No que cinca a la fabricación de payueles soi alumnu de Pelayo Fernández Fernández, gaiteru durante munchos años na Banda Gaites Mieres del Camín y en “La Bandona” amás de ser inxenieru industrial que dedico parte de la so investigación a la caña pa gaita.

Con él faigo varios cursos na EMT de Llangréu, bien talleres sueltos como “Acabáu y construcción de payueles asturianes“, “Afinación, mantenimientu y cuidaos de la gaita asturiana” nel añu 2005 o los talleres “Construcción de Payueles I” y “Construcción de Payueles II” desendolcaos en dos fines de semana na mesma escuela nel añu 2006.

Tamién soi alumnu de Pelayo Fernández na asignatura de “Mecánica y mantenimientu de la gaita asturiana” na EMT de Llangréu nel añu 2006 y posteriormente asisto otra vegada a clases con él dende l’añu 2010.